Syair Tuhan Kasih Kapada Kita

SYAIR  TUHAN KASIH KAPADA KITA

 

Tuhan kasih kapada kita
Sasungguhnya gaib tiada nyata
Tiada malihat nang picak mata
Urang nang kanal mamandang nyata

Siapa malihat darajat diangkat
Dangan Tuhannya sungguh malihat
Mahabarakan tiada hingkat
Itulah urang nang banar-banar karamat

Cubalah rasa dilihat-lihat
Barasih hati janganlah rigat
Dikanal diri dangan hakikat
Pinandu diri tajalli zat

Kapada Tuhan handaklah kanal
Tarikat dzikir dibuat mudal
Jangan diturut hati nang babal
Supaya banyak babuah amal

Sumbahyang dzikir bukan balaku
Hakikat hatinya hanya Tuhanku
Sakalian pakarjaan tiada dikaku
Tuhan tajalli hilanglah aku

Urang nang malihat akan Tuhannya
Karena khusuk mata akalnya
Dangan nang picak mata hatinya
Tiada satunju urang kaduanya

Arti hakikat talalu pangar
Dicala urang tiada didangar
Bila difitnah hati pun sabar
Hakikat makrifat tak mau takitar

Masuk khalwat dzikir
Kapada Tuhan disuruh hampir
Kasap mamandang nang ghaib dzahir

Guru mursid dicari galih
Ulama dzahir mancari pakulih
Mamaham kitab alih ba-alih
Dangan nang banar biar salisih

(Sunarti dkk, 1978:205-206)