SYAIR GALUH KARUANG

SYAIR GALUH KARUANG

Tarsabut pula Bayang Bastari
Tunduk manangis di kursi sari
Tarcinta Karuang muda parlinti
Bayan bapangsar sabagai mati

Galuh Karuang kakasih cinta
Alis saparti tulisan pata
Sadang mancari sajagat nata
Karuang jua di mata-mata

Gundah hatinya batambah rawan
Bahampas-hampas di dalam paraduan
Pikirannya tiada lagi karuan
Tarcinta Karuang amas tampawan

Hatinya Bayan tiadalah sanang
Sabab tarcinta Galuh Karuang
Siang dan malam masih taganang
Rasanya tiada baumur panjang

Hatinya Bayan sudah taikat
Pada Karuang muda nang cakap
Biar babagai panawar ubat
Janganlah sanang batambah girat

Karana akan Galuh Karuang
Tatalu patut lawan dipandang
Parsis nangkaya bulang nang tarang
Matanya landap nangkaya bintang

Bahunya bidang pinggangnya laris
Anak rambutnya malanak wilis
Mukanya nangkaya bulan sahiris
Eluk majelis patut dipandang

Tangannya lantik bagai dikadang
Gulunya langgak laksana wayang
Sirih dimakan babayang-bayang
Cih-cih amas intan parimantan

Timbang apalah abdi nang lata
Rasanya hancur sagala anggota

Daripada sangat manaruh cinta
Bayan tiada karuan pikir wan rasa

Tarcinta untung kadangan takdir
Dibawa bajalan hulu dan hilir
Dangan air mata juga mangalir
Bajana Allah untung tuanku fakir

Baginilah juga balalawasan
Tarcinta Karuang muda parawan
Rasanya hilang nyawa di badan
Rasanya lunglai tulang bilulang

Rasanya hilang ruh sumangat
Lamah sagala tulang wan urat
Tarcinta Karuang Kasuma Ningrat
Payahlah diri jadi mudarat

Kalau bagini sapanjang-panjang
Diri rasanya tiada tasandang
Sangat tarcinta Galuh Karuang
Baiklah mati diriku garang

Cih-cih amas kasuma ratu
Sabagai bala rasa hatiku
Jika tiada supan wan malu
Pasti kubawa pada pangulu

Bayan Bacinta malam wan siang
Mudahan bajudu lawan Karuang
Tiada lama satumat barang
Sabab nin sudah tasambat urang

Ya Allah amas hatiku rindu
Sabagai amas dipandang pinandu
Manis saparti nangkaya madu
Mudahan kiranya lakas bajudu


Ya Allah Karuang urang babangsa
Hamba nang hina timbanglah rasa
Saumur hidup tiadalah bisa
Mudahan mati takana siksa

Jika umpama pudak wan pandan
Galuh Karuang muda parawan
Ditimang-timang diparmainakan
Dipaluk dicium atas ribaan

Sakit hati bukan sabagai
Urat wan tulang pun rasanya rakai
Bukannya kurang pakai wan kurang makan
Sabab nin maksud baluman sampai

Bayan bapikir di dalam hati
Taganang Karuang muda parlinti
Handak badatang supan sandiri
Lalu mamanggil Sarindit Padi

Aduhai saudaraku Sarindit sungsang
Tuan kupinjam nang ka subarang
Tidakan lama satumat barang
Manukuniakan Galuh Karuang

Aduhai saudaraku Sarindit Padi
Galuh Karuang kiranya sudi
Bawakan rupiah sapuluh bigi
Tanda mangikat tanda nang pasti

Jikalau kakanda ka subarang situ
Tunjukkan kupiah sapuluh buku
Kapada Karuang kasuma ratu
Tandanya mau lawan diaku

Sarindit basigra manyahut kata
Ditanyai saja supaya nyata
Gampang sakali mambuang harta
Kakanda dahulu mandangar pata

Sarindit malayang ka subarang
Mambasuh muha singgah di batang
Lalu naik ka muhara lawang
Sigra ditagur ulih Karuang

Karuang bakata dangan palahan
Duduk ka mari apalah tuan
Dangan Sarindit bahahadapan
Satalah itu manjulung puan

Galuh Karauang manjulung puan
Manginang sirih maambil puan
Sirihnya karing tiada karuan
Katuyung tulang bangkaian

Sarindit manyabut pada sakarang
Jangan bagitu kata pun kakang
Sirihnya hidup lagi bagagang
Gambirnya wangi kapurnya latang

Bakata pula Galuh Karuang
Apakah karja ka mari datang
Adakah gawi kakang bailang
Bulih katakan kakang sakarang

Sigra manyahut Sarindit Padi
Datang ka mari basarah gawi
Bukannya ada nang kita gawi
Bita disuruh Bayan Bastari

Galuh Karuang hatinya hiran
Apakah maksud kakanda Bayan
Datang ka mari basusuruhan
Apakah tuan nang kakurangan

Sarindit manyahut sambil manginang
Bayang manyuruh pada pun kakang
Manakuniakan Galuh Karuang
Kalunya mau bulih badatang

Sarindit sangat pandai bakata
Harum manis mambawa sabda
Lamah limambut barang carita
Karana handak maminta parhamba

Inilah maksud Bayan Bastari
Handak maminta parhambakan diri
Jikalau tuan kiranya sudi
Palaran pakai mambasuh kaki

Inilah maksud Bayan bangsawan
Handak maminta parhambakan
Jikalau sudi adinda tuan
Jangan kiranya salah ambilan

Tuan pikirkan di dalam kalbu
Akan carita baik bagitu
Jikalau sudah kiranya mau
Inilah kupiah sapuluh buku

Bayan bakirim maminta sampaikan
Kapada Karuang muda bangsawan
Jikalau kiranya tuan parkanankan
Tatapi jangan saling gusaran

Karuang barangkat dangan lastari
Sarta bamamai wan mamisuhi
Aku tiada handak balaki
Lawan Bayan nangkaya babi

Karuang bakata bauling-uling
Lalu barangkat sarta manjaling
Baiklah aku mambari kucing
Aku tak sudi balaki maling

Karuang lari tapih disingsing
Katamu itu saparti anjang
Dalasan kusalai wan kugarinting
Tiada paduli manjarah karing

Mangapa Bayan bagitu lasku
Bayan tiada bandinganku
Rupanya jahat nangkaya hantu
Tiadalah patut lawan diaku

Bayan nin jangan kata bagiatu
Bancinya sangat rasanya aku
Rupanya jahat sangat talalu
Patuk mambalit ka bawah dagu

Karuang bakata talalu banci
Jalan Sarindit ikam kambali
Aku tak mau ma-ambil laki
Patuknya kait nangkaya taji

Burung Sarindit talalu malu
Mandangar Karuang kata bagitu
Patuknya Bayan mambalit dagu
Sama nangkaya lawan diaku

Sarindit marasaakan dirinya
Kalawan Bayan sama patuknya
Dibajah Karuang sangat malunya
Mambajah Bayan mambajah dirinya
(Sunarti dkk, 1978:207-213)