Syair Tija Diwa karya Anang Mayur Babirik

SYAIR TIJA DIWA

Inilah mula syair dikarang
Ditulis di kertas wangkang
Ulih pambaca Adi dan Kakang
Syair Panglipur hati nang pusang

Tampatnya di kartas tipis
Kalam dan pina sagan manulis
Hati dan jantung rasa dihiris
Tunduk tingadah bapikir habis

Syair dikarang bukannya latah
Mandam bapikir tunduk tingadah
Hati pusang batambah-tambah
Mudahan sampai nang ditujulah

Mangarang syair barhati syair
Tampat karangnya di sungai ular
Bukannya pandaian atawa pandikar
Hanya mangarang sakadar-kadar

Mangarang syair sakadar-kadar
Tukang bacanya si urang buntar
Minahu kakabar inya baputar
Tampatnya itu di subarang pasar

Syair Tija Diwa ini namanya
Banyak tauladan kita rasanya
Riwayat bahari samuanya
Kita dangar sangat inginnya

Sakarang Tija Diwa bapasan
Barang siapa bersusah pikiran
Manganal ia kapada puhun kaluyunan
Harapakan diparhatiakan

Partama inya bapasan
Ruku timbaku minta tatapakan

Untuk hadirin sakalian
Supaya sanang nang mandangarakan

Kedua inya bapasan
Kapada hadirin nang sakalian
Waktu mambaca jangan bapapandiran
Patah sabilah minta diadakan

Kaampat lagi inya bapasan
Kapada puhun rumah punya gawian
Mambaca syair nang samalaman
Habis makan badaliakan

Mambaca syair sampai dinihari
Anim babunyi baganti-ganti
Tahu riwayat urang bahari
Mangandung tauladan banyak sakali

Cubalah dangan tamjidul gapur
Hatiku bulat sabagai talur
Mandangar syair bahati hancur
Pacahlah sakarang sungai bubur

Habislah sudah Tija Dewa bapasan
Air sacangkir minta adaakan
Untuk pambaca nang dipuhunakan
Sakarang hampir dimulaiakan

Satalah sudah nang damikian
Kita samua baampun-ampunan
Kalau ada salah parkataan
Haraplah sangat dikasihakan

Adapun akan syair ini
Parmulaan hilang tak dapat mancari
Tarsabut Ajar di batas giri
Anaknya dua orang sangat sakti

Nang lanang Puncara Rangin namanya
Gagah barani susah bandingnya
Di atas gunung itu tampatnya
Barsama dangan hamba sahaya

Anak Ajar kadua Purnama Sari
Siwa tarabang di awan tinggi
Rupanya iluk bukan tarpari
Susah bandingnya intiru nagarai

Tarsabut pula satu parkataan
Nini Randa nang disabutakan
Tampat badiam di dalam hutan
Baisi kabun bunga-bungaan

Adapun Tija Diwa
Kapada Rangda ia bakata
Adat niniku urang nang tuha
Cucu barhanti sudilah kira

Rangda manyahut balas kasihan
Kalau cucuku sudi naik turun
Galagar japuk garang junggatan
Hatapnya tiris lantainya patahan

Tija Diwa mamandang hiran
Kapada Rangda urang kasihan
Banyak bakabun bunga-bungaan
Kapul manggis langsat rambutan

Tija Diwa bamandi-mandi
Sambil bakata di dalam hati
Syukurlah aku datang ka mari
Di tangah padang hiwan manari

Tija Diwa dijamuakan
Ulih Rangda di dalam hutan
Makannya banyak bukan buatan
Karana parutnya nang kalaparan

Tija Diwa hiran tacangang
Malihat Rangda mangarang kambang
Satiap hari Rangda badagang
Jalannya jauh jalananya lajang

Tija Diwa bakata pulang
Kapada nini bunda saurang
Jadi satiap hari baulang-ulang
Rangda manyahut lindah kamujang

Tija Diwa baduduk di lawang
Mahadang nininya bajual kambang
Saurang tiada datang bailang

Tija Diwa turun mangarang bunga
Nini Rangda suka tiada takira
Rangda badagang sangat lakunya
Salama ada Tija Diwa di rumahnya

Rangda badagang laku sakali
Samua urang datang mambali
Siapa nini punya karangan ini
Karangannya urang bahari

Rangda bakata dangan palahan
Kapada Radin Muda Bangsawan
Lama bajalan di dalam hutan
Lakas cucu basuram badan

Ada sapalih urang kada parcaya
Mustilah nini ada pambantunya
Katanya Rangda nang sabanarnya
Tiada urang lain nang mangarangnya

Purnama Sari nang disabutakan
Mancium kambang tiada busan
Handak bajalan saurang badan
Ka rumah Rangda ka dalam hutan

Purnama Sari urang tabilang
Mahadap Ajar urang tabilang
Handak parmisi anakda ninguang
Ka rumah Rangda manukar kambang

Ajar manyahut dangan lastari
Aduh anakku intan biduri
Jangalah lama anakda pargi
Dua tiga jam musti kambali

Purnama Sari nang ma-inggihkan
Tiada lama ulun bajalan
Kalu datang anu Rangda kasian
Mambali bunga kambali badan

Purnama Sari turun bajalan
Saurang diri ka dalam hutan

Tiada saurang inya bataman
Hanya mambawa hati dandaman

Purnama Sari datang sakarang
Inya tarabang di awang-awang
Sampai di rumah Rangda tabilang
Purnama Sari mamanggil bukai lawang

Aduh niniku bukai lawang
Ulun datang bahati pusang
Rangda manyahut pada sakarang
Dangan siapa kawan bailang

Purnama Sari manyahut pari
Ulun bailang saurang diri
Tiada takut datang ka mari
Karana hatiku sangat birahi

Rangda malihat hatimya giris
Tuan Putri iluknya manis
Tuan putri tunduk manangis
Hati di dalam rasa dihiris

habar cucu datang ka mari
tiada bakawan saurang diri
Putri manyahut dangan lastari
Kapada Nini Rangda urang bahari

Jadi sudi datang ka mari
Mambali bunga ada sakaki
Bunganya harum sangatnya wangi
Rangda mamandang kanan dan kiri

Purnama Sari namanya putri
Manyahut kata dangan lastari
Kalau ulun tak suka diri
Tentu tiada datang ka mari

Tija Diwa mamandang hiran
Kapada putri muda bangsawan
Sama-sama tabaraung bajajanakan
Di dalam hatinya galugupan

Purnama Sari nang damikian
Dandaman birahi hati kasmaran
Malihat Tija Diwa urang andalan
Hati pusang tabalik nyaman

Tija Diwa manyahut warti
Syukurlah datang kasuma gusti
Nang baik rupa namng baik budi
Panjang tipis pamutus hati

Syukur datang kasuma gusti
Jika datang malah nang kusuluhi
Karena kakanda lama mananti
Barapa bulan barapa hari

Tija Diwa radin bang-bang
Dangan sagara bakata pulang
Apakah habar ratu mas datang
Lakas manyahut intan dikarang

Purnama sari manyahut saba
Basar gawi tuan adinda
Handak mambali bunga suganda
Mabuk kasmaran hati adinda

Bunga kaki nang harum wangi
Namanya itu panglipur hati
Hanyalah itu katuju hati
Mudahan lipur lara baganti

Radin bakata dengan segeranya
Adalah bunga sangat buruknya
Salagi pula tiada baunya
Tiada patut amas ampunnya

Jika bagus kiranya kambang
Tantu sadah dibali urang
Tiada ampunnya intang di karang
Banyaklah sudah urang nang datang

Tuan putri manyahut pula
Biarpun buruk itulah bunga
Hati adinda sangat inginnya
Biar tiada babau kubali juga

Jadi kambang tiada dibali urang
Karena puhun baru bakambang
Adinda mancium mabuk kapayang
Tiada kawa kagi mambuang

Tija Diwa radin pangiran
Hatinya mancium mabuk kapayang
Bakata manis kidung cumbuan
Diwa bapantun nang malipurkan

Bunga taratai namanya pantun
Karangan ulih orang kayangan
Batimbuk hati buah satahun
Guring sakijip nang kaganangan

Bunga kacubung dari halaman
Burung galatik hinggap di tuga
Mimpi sakurung bapapalukan
Panas dingin rasa badanku

Itulah pantun radin pangiran
Bunga pandan karangan tanjung
Jika dapat nang kutampaiakan
Kapada ratu mas tuah bauntung

Manyahut pantun intan parmata
Bunga suganda di dalam kuta
Lagi raja pandusta
Bunyinya habar carita

Manyahut radin bunga bangsawan
Ia bapantun baganti-gantian
Rangda mandangar sukalah badan
Bibir tabalik Rangda mandangarakan

Tija Diwa radinnya mantri
Badakat kapada tuannya putri
Dangan basagara mamigang jari
Aduh amas intan biduri

Jaliwadar jalan kandangan
Taman tiwarung dari halaman
Kalau sahibar bapapandangan
Guring sakurung makalah nyaman

Cih diriku untungnya malang
Banih ditanam tumbuh halalang
Ikam bapanggang batinggal tulang
Main batali disambar halang

kapal di laut ka banuaku
anak angsa mandi barandam
malakal maut ambil nyawaku
tiada kuasa manaruh dandaman

Radin mambujuk putri bangsawan
Ditinang-timang atas ribaan
Dipaluk cium amas tampawan
Karena hati sangan kasabaran

Aduh amas intan parmata
Kalau kiranya kakang badusta
Baik bunuh badan kakanda
Tikam lawan pipi nang kiwa

Putri bakata dangan palahan
Kakanda nang talanjur tangan
Sambil mangibit kiri wan kanan
Talalu gila kakanda tuan

Mambujuk pula radin mantri
Sambil mamaluk tuan putri
Mudahai tacarai diri
Mabuk kasmaran apalah ini

Radin itu putra bangsawan
Batamu hati kasmaran
Tamsil kapal dari lautan
Tiada tahanti nang malayarakan

Satalah sudah bahanti pari
Tija Diwa dan tuan putri
Batamu bacinta gati
Sakarang tiada tasabut lagi
(Syarifuddin R, 1994. Majalah Bandarmasih Banjarmasin)